سِري ڪانهرو، سِري کنڀو، ننڍو سِـلي

50 سينٽي ميٽر جسامت جي هن پکيءَ جا نر ماد ھڪجھڙا هوندا آهن ۽ اهو پنهنجي ڪٽنب جي سڀني پکين کان وڌيڪ پاڻيءَ کي ويجهو رهي ٿو. ڪن افزائشي علائقن ۾ ولرن ۾ ڏسبو آهي. پاڻيءَ کان ڪجهه پرڀرو وڻن تي آکيرو ٺاهيندو آهي.
اڏار مضبوط اٿس، ڳچي ٻاهر ڪڍي، پَـر ڦڙڪائيندو ۽ هلڪا لامارا ڏيندو آهي. ان جو آکيرو بي ڊولو ۽ ڪاٺڙين جو ٺھيل هوندو آهي، جنهن ۾ چوزا غذا لاءِ پيا چيخندا آهن. ماءُ پيءُ انهن لاءِ خوراڪ چهنب ۾ جهلي کڻي ايندا آهن ۽ کين کارائيندا آهن.
غير لڳ واري مند ۾ ان جي پُٺي ڪاري سرمائي ٿئي ٿي ۽ ڳچيءَ جي ٿيلھي گلابي، چهنب جي چوٽيءَ ۾ خم ٿئيس ٿو ۽ ڳچيءَ ۾ روپلو چٽو ھوندو اٿس. لڳ واري مند ۾ ھلڪي چمڪدار ڪاري پٽي سائڙي جھلڪ سان هوندي آهيس ۽ روپلو پٽو غائب ٿي ويندو آهي.